Küfr-i zülfün salalı rahneler îmânımıza - Fuzûlî
Divân Edebiyâtı
Bu gazel Mecnûn dilindendir.
Küfr-i zülfün salalı rahneler îmânımıza
Kâfir ağlar bizim ahvâl-i perîşânımıza
Seni görmek müteazzir görinür böyle ki eşk
Sana bakdıkda dolar dîde-i giryânımıza
Cevri çok eyleme kim olmaya nâgeh tükene
Az idüb cevr ü cefâlar kıluban cânımıza
Eksik olmaz gamımız bunca ki bizden gam alub
Her gelen gamlu gider şâd gelüb yanımıza
Var her halka-i zencîrimizin bir ağzı
Muttasıl vermeğe ifşâ gam-ı pünhânımıza
Gam-ı eyyâm Fuzûlî bize bî-dâd itdi
Gelmişüz acz ile dâd itmeğe sultânımıza
Fuzûlî
